वैशाख २७, भियतनाम । प्रधानमन्त्री केपी शर्मा ओलीले शुक्रवार यहाँको हा लोङ खाडी भ्रमण गर्नुभयो । प्राकृतिक सौन्दर्यले भरिपूर्ण सो खाडी क्वाङ निन्ह प्रान्तको आकर्षक भ्रमण गन्तव्य मानिन्छ ।
हा लोङको अर्थ ओर्लिरहेको ड्रयागन हो । १ हजार ५०० बर्गकिमिमा फैलिएको सो खाडी १ हजार ६०० सानाठूला चूनढुंगाका द्वीपमा छरिएको छ । सन् १९९४ मा युनेस्कोको विश्वसम्पदा सूचीमा सूचीकृत यो खाडीमा विविध जैविकता रहेको छ । खाडीका कुवा, भान, बा हाङ, कोङ ताउ र भोङ भिएङ गाउँमा १ हजार ६०० जनसंख्या छ, जो माछा र सामुद्रिक जीवहरुमा निर्भर छन् ।
प्रधानमन्त्री ओली भियतनामका प्रधानमन्त्री न्युग्यन सुआन फुकको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गरी हाल भियतनाम भ्रमणमा हुनुहुन्छ ।
प्रधानमन्त्रीका साथ उहाँकी धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र सल्लाहकार डा. राजन भट्टराई, सांसद, नेपाल सरकारका उच्चपदस्थ पदाधिकारी, स्थानीय तहका निर्वा्चित प्रतिनिधि, उद्योगी–व्यवसायी तथा सञ्चारकर्मी छन् । रासस
