काठमाडौं । चलचित्र ‘एक भगवत् गीता’को पोस्टर आज(शुक्रबार) सार्वजनिक भएको छ । अगामी भाद्र २९ गतेबाट प्रदर्शनको तयारीमा रहेको उक्त चलचित्रको सार्वजनिक पोस्टरमा विपिन कार्की, सुहाना थापा, धिरज मगर र बालकलाकारलाई देख्न सकिन्छ ।
चलचित्रको ‘क्यारेक्टर लुक्स’ पोस्टरमा धिरज र सुहाना रोमान्टिक अवतारमा देखिएका छन् भने विपिन ट्रान्सजेन्डर लुक्समा प्रस्तुत छन् । अन्तरजातीय प्रेमकथामा आधारित रहेको सिनेमामा कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरलगायतको अभिनय छ ।
सुनिल कुमार थापाको निर्माण रहेको सिनेमाको कथा निर्देशक झरना थापाले गरेकी हुन् । झरनासँगै सरिन पोखरेल, परिक्षेद सेन, पुरुषोत्तम ढुंगेल र कृष्णको पटकथा रहेको सिनेमामा परिक्षेद र पुरुषोत्तमले संवाद लेखेका हुन् ।
सुहाना इन्टरटेनमेन्ट र सुनिल कुमार थापा प्रोडक्सनको ब्यानरमा निर्माण भएको सिनेमामा राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर, हर्कुलस बस्नेत, आशिष अविरल र प्रवेश मल्लिकको संगीत रहेको छ ।
झरनाको चौंथो निर्देशकीय यो फिल्मको छायांकन सुरु हुँदा नाम ‘भगवत् गीता’ राखिएको थियो । अहिले नामको अगाडि ‘एक’ थपिएको छ । सिनेमालाई काठमाडौं उपत्यकामा गोविन्द शाहीको काफिया फिल्मस् र काठमाडौं बाहिर केदार पराजुलीको श्री कृष्ण फिल्मस्ले वितरण गर्ने भएको छ ।
