काठमाडौं । थिम्पुमा मुख्यालय रहेको भुटानको पहिलो निजी एयरलाइन्स, भुटान एयरलाइन्स (बि–३) ले आफ्ना फ्लाईटहरु पुनःसुरु गर्ने घोषणा गरेको छ । नेपालको आधिकारिक जनरल सेल्स एजेन्ट (जीएसए) सोसाइटी इन्टरनेशनल ट्राभल सर्भिसेस(आरआर ग्रुप अफ कम्पनीको भगिनी संस्था)का अनुसार यहि भाद्र ३० गतेबाट उक्त एयरलाइन्स सुचारु हुने जानकारी दिएको हो ।
यी उडानहरु भाद्र ३० गतेबाट आइतबार, सोमबार, बुधबार, र शनिबार गरी हप्तामा चार पटक हुने भएका छन् । यी उडानहरुले पारो–काठमाडौं–दिल्लीलाई दुईतर्फी रुपमा जोड्ने छन् । निर्धारित फ्लाईटहरु पुनःसुचारु गरेसँगै भुटान एयरलाइन्सले विश्वव्यापी कोभिड–१९ को महामारीका कारण रोकिएको काठमाडौंका उडानहरु पुनःसुचारु हुने भएको हो ।
“थन्डर ड्रागनको भूमि”भनेर चिनिने भुटानले पर्यटन प्रवद्र्धन गर्ने र नेपाल भुटान सम्बन्धलाई सुदृढ गर्ने प्रतिवद्धता अनुरुप सन् २०१३ बाट भुटान एयरलाइन्सले आफ्नो पहिलो काठमाडौं उडानको शुरुवात गरेको थियो ।
भुटान–काठमाडौं फ्लाइट पुनः सुचारु भएकोमा खुशी व्यक्त गर्दै भुटान एयरलाइन्सका प्रमुख कार्यकारी अधिकृत पेमा नाडिकले भने, ‘एकनिजी एयरलाइन्स भएका कारण हामीले कोभिड–१९ महामारीको समयमा उडानहरू रद्द गर्ने वा रिरुट गर्ने जस्ता कठिन निर्णयहरू लिनुपर्ने जस्ता चुनौतीहरूको सामना गर्नु परेको थियो । यसले अवश्य पनि हाम्रा ग्राहकहरुलाई असुविधा भएको थियो र हाम्रो विश्वसनीयतामा पनि प्रश्न उत्पन्न भएको थियो भन्ने हामीलाई अवगत छ । यिनै कुराहरुलाई मध्यनजर गर्दै यसपटक भने हामी उडान तालिका नियमित राख्न प्रतिबद्ध छौं । हामी हाम्रा सम्पूर्ण ग्राहकहरुलाई यो विश्वास दिलाउन चाहन्छौँ कि हामी जस्तोसुकै चुनौतीपूर्ण समयमा पनि उडानहरु अब नियमित राख्नेछौँ र विश्वसनीय वायुसेवाको रुपमा आफूलाई स्थापित गराउने छौँ ।’
त्यस्तै सोसाइटी इन्टरनेशनल ट्राभल सर्भिसेजका चेयरम्यान रविचन्द्र सिंहले भने, ‘भुटान एयरलाइन्सको उडान पुनःसुरु भएकोमा हामी अत्यन्तै उत्साहित छौं । यस नयाँ सुरुवातका साथ दुबै देशका पर्यटकहरूलाई थप सहज हुनेछ र यसले पर्यटन उद्योगलाई थप प्रवद्र्धन गर्ने छ भन्ने कुरामा हामी आशावादी छौं । भुटान एयरलाइन्सको लागि नेपालको आधिकारिक जीएसएको रूपमा हामीले यस एयरलाइन्समार्फत सर्वोत्कृष्ट सेवा प्रदान गर्न प्रतिबद्ध रहने छौं ।’