जेठ ३, सोल । उत्तर कोरियामा यस शताब्दीकै सबैभन्दा ठूलो खडेरी परेको छ । यसबाट यहाँको जनजीवन नराम्ररी प्रभावित हुने देखिएकोे छ ।
समाचारमा उल्लेख भएअनुसार यस खडेरीका कारण यस शताब्दीकै सबैभन्दा बढी यहाँका नागरिक प्रभावित भएका भन्दै यसप्रति विश्व खाद्य कार्यक्रमले पनि गहिरो चासो व्यक्त गरेको छ । यस देशको अवस्थाको बारेमा हामीले गम्भीर चासो लिएका छौं’, विश्व खाद्य कार्यक्रमका एकजना अधिकारीले बताए । त्यहाँ खाद्यान्नको संकट हुनसक्ने उनीहरुले जनाएका छन् ।
उत्तर कोरियाले विगतमा गर्ने गरेका आणविक परीक्षणका कारण उसमाथि कडा खालका आर्थिक लगायतका नाकाबन्दीहरु लगाइएको छ । अर्कातर्फ यहाँ खडेरीका कारण खाद्यान्न अभाव हुनसक्ने भएकोले यसप्रति आफूहरु संयमित भएको उक्त कार्यत्रमका अधिकारीले जनाएका छन् । यीनै नाकाबन्दीका कारण विगतमा पनि उत्तर कोरियाले खाद्यान्न संकट व्यहोर्नुपरेको बताइएको छ । यस पटक खडेरी नै परेकोले उनीहरुलाई खाद्यान्न संकट पर्न सक्ने अनुमान छ ।
यस प्राकृतिक प्रकोपका कारण अन्न उत्पादन पनि करीब पाँच लाख टन कमी आउने अनुमान छ । त्यसैगरी कृषि उपजको कमी आउने र सिंचाईँको प्रबन्धको कमीका कारण खाद्य उत्पादनमा समस्या उत्पन्न हुने अनुमान छ । यस वर्ष उत्तर कोरियामा सन् १९१७ यताकै सबैभन्दा थोरै पानी परेको छ । यस वर्षभरमा गत बुधवार ५६ दशमलव ३ मिलीलिटर मात्र पानी परेको थियो । जुन सन् १९१७ यताकै सबैभन्दा थोरै पानी परेको वर्षका रुपमा लिइएको छ ।
यहाँको एक सरकारी पत्रिकाले यो खडेरीका कारण गहुँ, मकै, आलु, सिमी तथा अन्य खाद्यान्न बाली लगाउने समय पनि गुज्रिएकोले अब विस्तारै खाद्यान्न संकटको समस्या देखिँदै जाने उल्लेख गरेको छ । उक्त पत्रिकाले विश्व खाद्य कार्यत्रम र संयुक्त राष्ट्रसंघलाई उदृत गर्दै जनाएअनुसार यहाँका करीब १ करोड नागरिकले खाद्यान्न संकटको सामना गरिरहेका छन् ।
यो यस शताब्दिकै सबैभन्दा ठूलो खडेरीको अवस्था हो र यसबाट उत्तर कोरियाका करीब ४० प्रतिशत नागरिकले यस्तो समस्या भोगिरहेको जनाइएको छ । तर उत्तर कोरियाले भने विश्व समुदायप्रति तिक्तता पोखेको छ । उसले वर्षौंदेखि आफ्नो आणविक कार्यक्रमको मात्र विरोध गर्ने गरेका र आफ्नो खाद्यान्न समस्याको बारेमा नसोचेको बताएको छ । रासस / एएफपी
